٧ الوان للكاتبة الجميلة سارة المغازي

افكار القصص تكون معظمها مبتكرة جدا وجديدة بالنسبة للقراء

من: ياسمين ثابت

غلاف الكتاب

الحقيقة ده مش اول كتاب اقراه للكاتبة سارة انا قرأتلها البوم صور واشتفيت منه انها شخصية رقيقة جدا وفي نفس الوقت تشبهني واشبهها لحد كبير في التعبير عن المشاعر

بس الحقيقة المجموعة القصصية دي تخطت فيها روعة وقوة المجموعة الاولى بمراحل
اولا الاسلوب كان اقوى بكتير ثانيا الشاعرية والرقة ازدادت وبقت اقوى وانضج
ثالثا افكار القصص كانت معظمها مبتكرة جدا وجديدة بالنسبة لي
رابعا الغلاف والطباعة عجبوني اوي

اكتر حاجة حتلاحظها في الكتاب ده ان القصص مش مكتوبة لمجرد افكار مش مكتوبة اعتباطا كدة

لا مكتوبة لهدف وهدف كويس ونبيل ومحترم يساعد القارئ انه يكون افضل ينظر للحياة بشكل احلى….هو كتاب من كتب الادب النظيف فعلا مفيهوش ولا حرف ممكن يؤذيك او يضايقك بالعكس حتحس وانت بتقرا الكتاب بعذوبة وسعادة وسلاسة في الكلام وفي الافكار وفي مشاعرك وهي بتتحرك مع كل قصة

كمان بداية الكتاب قوية جدا اول قصة قصة العود من اروع وارق القصص في حديث مع النفس وعتاب ممزوج بالموسيقى كيف يمكن ان تكون الحقيقة بوجهها الخادع امامنا واضحة دون ان ندري كيف لم نرى هذا كل سنين حياتنا الماضية
بعدين تيجي قصة الجميلتان تبهرك وتلاقي نفسك بتقول اوبا شكله حيبقى كتاب جامد جدي فيها لقاء بين الكاتب وشخصيات كتبه, وتأثيره عليها ورؤية جديدة جدا ومختلفة لهذا الموضوع الشيق للغاية اثارني جدا واثر في بشكل شخصي

خريف الحلم:
لا خريف للاحلام حتى لو جاء خريف العمر…قصة تبعث الامل

الثقب الاحمر:
نهاية درامية ومشهد يهز الوجدان

ينابيع الحجر:
كيف يستغل الاخرين ضعفنا فيحولنا احجار

الملحمة:
قصة رائعة عن مفهوم التفاصيل والصورة الكاملة في رسم الحياة وكيف يفهمها الناظر

البحيرة السوداء:
قصة رقيقة كالاسطورة عذبة جدا

لا اريدك:
من اعمق وارق القصص واكثرها تأثيرا بجد اكتر قصة حبيتها

1+1=1
ما تأثرتش بيها اوي ولو ان موضوعها مهم

كأس الجارية:
حين تصفق لان الجميع يصفقون…رسالة قوية

حبيبة القمر:
قصة فيها اسلوب ساخر وخيالي ورقيق جدا

جنون الارقام:
لم افهم جيدا المغزى من الحكاية لاني وجدت ان استاذه على حق

الخُطبة:
حين تأتي كلماتك بعد فوات الاوان…خصوصا اني من الشخصيات اللي باحس اني زي البطلة سجينة الماضي….حكاية واقعية

مذكرات لا احد:
مذكرات تطرح افكار ورؤية مختلفة

سباق الابجدية:
من اروع قصص الكتاب قصة هادفة وفيها تصوير في منتهى الابتكار حتقابلك في الاخر وتخليك تقفل الكتاب وانت سعيد

المدهش بقى ان الكاتبة كتبت بعض القصائد من قلمها حسيت انها مبهرة في الموضوع ده جدا ….كمان المقتطفات اللي كانت بتسبق القصص كانت بتعجبني اوي

انصح الجميع بقراءة هذا الكتاب لانه فعلا جميل وفيه افكار جديدة وهادفة ومش حيكون في اي ضرر او ملل في قراءته

واحب اقول لسارة الف الف مبروك على كتابك الجديد وانا في انتظار الجديد اللي بعديه من دلوقتي كمان هههههههههههه